الواحد فى البلد دى نفسه يعرف لواء ولا حتى عميد فى البوليس اهو ينفع فى اى حاجة خناقة تتصل بيه عايز تطلع رخصة هو سداد ,وكده يعنى وهو يبقى معاك واسطة تنفعك فى دنياتك

وبعدين اكتشفت ان فى حاجات لواء البوليس مش هينفعنى فيه, مثلا لما ادخل الجيش يا فرحتى وانا اعرف لواء شرطة ولا ليه اى لازمة يبقى لازم كمان الواحد يعرف لواء جيش يظبطك بقه ينقلك وحدة قريبة من بيتكوا وينزلك كل اسبوع اجازة واهو يبقى معاك واسطة تنفعك فى دنياتك

بس برضه اكتشفت ان فى حاجات اللواءات ملهوش لازمة فيها,يعنى نتيجة الجامعة اتاخرت شوية ولا عملت مشكلة فى لجنة الامتحان وانت بتغش يبقى لازمك هنا دكتور فى الجامعة يسندك ,

يصيتك فى الجامعة واهو يبقى معاك واسطة تنفعك فى دنياتك

بس حتى دكتور الجامعة مش هينفعك وانت داخل سينما ومعاك اصحابك ومش لاقى تذاكر او المكان مش عجبك

يبقى لازم تعرف مدير سينما معينة او على الاقل واحد شغال هناك ,وبكده تضمن تخش سينما كل اسبوع واكيد هو هيديك دعوات مجانية تعزم اصحابك بيها وتتفشخر عليهم واهو يبقى معاك واسطة تنفعك فى دنياتك

وفى النهاية اكتشفت ان انت لازم تكون تعرف

لواء شرطة ,لواء جيش, دكتور فى الجامعة,موظف السينما,مدير شركة او اتنين,والحاجات دى على سبيل المثال مش الحصر

وعشان كده بيرم التونسى بيقول ايه

الواسطة لسه شغالة يا رجال

والحالة هياها الحالة فى كل مكان

لفندى قال والاسطى هيه الواسطة

فى كل مركز ومحطة خاتم سليمان

تشغلك وانت فراش كاتب بمعاش

وتدخلك سينما بلاش ويا الاخوان

ايه اللى خلى الملعونة تصبح فينا

شريعة فوق شرع نبينا شرع القران

طماع وعايز فوق حقه واسطة تزقه

لرئيس عمل فاتح بقه زى التعبان

والحق بين لتنين ضايع وهودا الشايع

مدير يبلطج على صايع عاطل كسلان

ومدير شريف حيرته حيرة وحوسته كبيرة

فى مطلب الست منيرة وخليل شعبان

يعفى ابنهم من الجهادية والبلدية

يجيب مخلفلتها عليه وعلى الجيران

داء فى الكنانة متمكن او متوطن

وجرح ضارب ومعفن زى السرطان

والله العظيم معاه حق